Talabalarning mustaqil ish loyihasini ishlash jarayonidagi ruhiy holatlari

Аннотация

Ushbu maqolada talabalarning mustaqil ish yoki loyiha ustida ishlash jarayonida kechadigan ruhiy holatlar
psixologik tahlil etilgan bo‘lib, ularning emotsional barqarorligi, stress darajasi, ichki motivatsiya va o‘z-o‘zini boshqarish
mexanizmlari o‘zaro aloqadorlikda yoritilgan. Mustaqil ta’lim jarayoni talabalarda ijodiy fikrlash, tashabbuskorlik va
refleksiv yondashuvni shakllantiruvchi muhim psixologik muhit sifatida talqin etiladi. Shu bilan birga, maqolada zamonaviy
psixologik nazariyalar – A. Bandura tomonidan ilgari surilgan “o‘zini samarali boshqarish” (self-efficacy) konsepsiyasi,
R. L. Lazarusning stress va moslashuv nazariyasi hamda X. Xekxauzenning motivatsiya psixologiyasi kabi yondashuvlar
asosida talabalarning mustaqil faoliyati tahlil qilinadi.
Tadqiqotda mustaqil ish jarayonida talabalarning hissiy kechinmalari, kognitiv faolligi, o‘z ustida ishlashga tayyorlik darajasi
hamda o‘quv motivatsiyasining ichki va tashqi omillar bilan bog‘liqligi ko‘rsatib o‘tiladi. Ayniqsa, loyihaviy faoliyat
davomida yuzaga keladigan stress holatlarini boshqarish, vaqtni samarali rejalashtirish, o‘z-o‘zini rag‘batlantirish va ijobiy
emotsional fonni saqlab qolish mexanizmlari psixologik tahlil etiladi.
Maqolada shuningdek, talabalarning ijodkorlik salohiyatini rivojlantirishda mustaqil ishning roli, o‘z fikrini mustaqil shakllantirish,
muammoli vaziyatlarda nostandart yechimlar topish va shaxsiy javobgarlikni his etish jarayonlari empirik hamda
nazariy asoslarda yoritilgan. Tadqiqot natijalari talabalarning o‘quv motivatsiyasini kuchaytirish, stressga bardoshlilikni
oshirish va o‘z-o‘zini boshqarish kompetensiyalarini rivojlantirish ta’lim psixologiyasi nuqtayi nazaridan muhim ahamiyatga
ega ekanligini ko‘rsatadi.